© 2018 Armana Marsihés

LOU COUROUNAMEN DE 1931

Vous parlèri dóu cinquanten anniversàri de l’escolo laïco. Va bèn. Mai qu vous a pas di qu'en 1931, l’aguè un autre evenimen foueço impourtant pèr Marsiho que vuei degun n’en parlo plus ges. Es lou courounamen de la Bouono Maire ! L’avié long-tèms que la duvien courouna mai lei poudé avien pas lou tèms, pecaire... Adounc, Mounsignour Dubourg decidè de va faire. Acò fuguè uno revoulucien que vous diéu pas ! Tout lou mounde n’en parlavon, à l’escolo, au patrò, pèr carriero, dins lei boutigo, lei cafè... Au mes de jun, l’aguè trei journado de foulié pioue, trei journado de fèsto que lei glèiso fuguèron clafido de fidèu. L’aguè de messo, d’óurfìci dins touei lei parròqui de la vilo e, bèn segur, dins la Baselico. Lou dijòu fuguè la journado deis enfant e, emé lou patrò, dins lou tantost assistèri à quaucarèn d'espetaclous. La couelo èro pleno de gènt. Emé mei coulègo, erian drecho sus lei roucas. L'avié pas un aubre sus la couelo qu'es l'annado d'après que lei plantèron... E talamen que fasié caud, trei persouno pròchi de nàutrei aguèron un còup de soulèu e fuguèron menado à l'espitau. À douge an vous pouèdi dire que vous pertoco ! Mai gàrdi subretout lou souveni dei cant. Tout lou mounde cantavon Ave Maria e, semblavo qu'èro la couelo de la Gàrdi que cantavo. E iéu de mi creba la gargamello, touto estrambourdado qu'èri ! Puei nous fauguè parti, davala dins lei roucas, dins la foulo. Urousamen lei souarre emé sei gràndei courneto blanco si vesien de lun, qu'aviéu pòu de mi perdre. E quouro mi retroubèri dins lou tram pèr rintra à l’oustau, èri touto countènto de ma journado, que m'en souvèni 86 an après coumo s'èro aièr ...

 

Janino DUPEYRAC

Bouonodi la voio de nouesto decano de l'UTL de Marsiho (Universita dóu Tèms Libre - A.M.U.) avèn pouscu entèndre en cous aquéu temouniàgi ouculàri toucant au courounamen de la Bouono Maire. E nouesto bello amigo manjara l'an que vèn, pecaire, dins sa 99èimo annado !

Longo mai !

Janino DUPEYRAC