© 2018 Armana Marsihés

SEGUÈNCI 5 - À LA GÀRDI DE MARÌO

"Counsoularello deis adoulenti", "soulas dei pecadou", "Maire de misericòrdi" : aquéstei lausenjo à Marìo, que lei fidèu li soun foueço estaca, dien coumo soun fisançous emai coumo la venèron. Quand s'adrèisson à-n-elo, es pèr li prasenta aquesto demando d'aquito : "Pregas pèr nàutrei", car si crèson soulide que Marìo es capablo d'intercedi pèr élei pròchi soun fiéu Jèsus qu'éu-mume es lou Camin devers Diéu. Tout fidèu que soun de l'Egliso en marcho dins l'istòri despuei 2000 an, van dins lei piado de Marìo. Maugrat que siegue davans, es em'élei qu'elo camino.

1 - Marìo : aquelo que diguè de "vo" à Diéu

À l'àngi Gabriéu que li venguè coumo acò : "Aquéu que va naisse de tu, li diran Fiéu de Diéu", Marìo li faguè : "Siéu la servènto dóu Signour. Que tout si capite pèr iéu coumo v'as di". Ameteguè ensinto de veni la maire dóu Messìo qu'elo esperavo coumo tout soun pople. "Vièrgi benesido" li dounè lou noum de Jèsus, es-à-dire "Diéu sauvo". Marìo aguè tambèn de viéure l'escande de la mouart de soun fiéu sus la crous. "Vièrgi dei doulour", acetè au trefouns d'elo que lou salut proumés pèr l'àngi passèsse pèr aquéu Messìo crucifica. Car lou matin pèr Pasco, Diéu lou redreissè de soun toumbèu, "proumié neissu d'entre lei mouart". Segound leis Evangèli, la vido de Marìo touto fuguè encanissado de joio emai de segren d'aquéstei "vo" douna à Diéu. Vaqui perqué rapresènto pèr lei crestian un moudèle de fe.

 

2 - Coumo leis Egliso crestiano li crèson dins la Vièrgi Marìo

Lou tresèime councile ecumeni d'Efèse prouclamè en 431 que "Jèsus es Diéu e verita emai que, pèr acò, la santo Vièrgi es "Maire de Diéu". Ensinto, es la fe dins la divinita de soun fiéu que faguè baia soun titre de "Maire de Diéu" (en grè Théotokos). Erian foueço avans lei garrouio que marquèron leis Egliso crestiano. Vaqui perqué touei counfèsson la fe dei Paire acampa en Efèse, qu'es la fe de l'Egliso primitivo.

 

Dins leis Egliso ourtoudosso, lou culte de la persouno de Marìo, la "Touto-Santo" (Panhagia), s'apielo majimen sus la plaço que tène dins lou Mistèri de l'Encarnacien. Emai aguèsse agu en partàgi d'un biais plenamen uman lou pecat dóu proumié paire, Adam, emai siguèsse passa pèr la mouart, la Touto-Santo es l'èstre uman lou pus sant e lou pus pur que lou Sant-Esperit li faguè sa demouero counformo au Mistèri de la Divino Ecounoumié.

Dins l'Egliso refourmado, en ligènt la Biblo, lei proustestant recounouisson la fe de Marìo coumo eisemplàri, soun óubeïssènço estraourdinàri emai soun umelita. Rapresènto la meno justo e justo dóu cresènt. Emai aguèsse reçu uno voucacien unico, Marìo rèsto plenamen fiho d'Israël maridado à Jóusè e que foundè uno famiho em'éu. Duou, coumo lou rèsto de l'umanita, reçubre pardoun emai salut dóu Crist.

 

Dins l'Egliso catoulico, doui dòumo fuguèron defini pèr subre-pes dins lei doui darrié siècle :

• aquéu de l'Inmaculado Councepcien, proumulgado pèr lou papo Pie IX en 1854 : "La benurouso Vièrgi Marìo fuguè au moumen proumié de sa councepcien, (...) gandido franco touto brutisso dóu pecat óuriginau".

• aquéu de l'Assoumcien, proumulgado pèr lou papo Pie XII en 1950 : "La Vièrgi inmaculado, aguènt coumpli lou debana de sa vido sus terro, fuguè enaussado couars e amo à la glòri dóu ciele". Faguè restoundido à-n-uno

cresènço foueço enciano dins lou Pounènt crestian.

3 - Marìo dins lou Couran

Dins la declaracien Nostra Aetate que lou papo Pau VI proumulguè lou 28 d'óutobre 1965, lei Paire dóu councile de Vatican II proufesson que "l'Egliso vèi em'estimo lei musulman, qu'adoron lou Diéu un, vivènt e sussistant, pietadous emai tout pouderous (...). Ounouron sa Maire Vierginenco Marìo e, de fes que l'a mume, l'envocon emé pieta". Verai, Marìo si n'en parlo mai que d'un còup dins lou Couran. Ensinto, la sourato 3,42 fa mencien que leis àngi la venguèron saluda. La sourato 19, que soun titre es "Maryam", fa lou raconte de l'Anounciacien, e parlo de la neissènço dóu fiéu de Marìo, Isaa (Jèsus). Coumo lei crestian, lei musulman venèron en Marìo soun biais pur, umble emai pietadous que

n'en fan un moudèle de fe.

4 - Lei fèsto marialo que comton dins l'Egliso catoulico

La fèsto de Santo Marìo, Maire de Diéu - Fuguè la proumiero fèsto marialo e, dins touto uno pountannado de tèms, la souleto. Fuguè istituïdo à Roumo à l'endeman dóu councile ecumeni d'Efèse de 431 qu'avié prouclama Marìo

Maire de Diéu (1é de janvié).

Leis àutrei fèsto majouralo

• La fèsto de soun Inmaculado Councepcien ramento que Marìo fuguè councebudo sènso lou pecat óuriginau (8 de desèmbre).

• La fèsto de la Nativeta, nòu mes après sa councepcien (8 de setèmbre).

• La fèsto de l'Anounciacien remembro lou jour que venguè l'arcàngi Gabriéu manda pèr Diéu pèr saupre se Marìo voudrié bèn èstre la maire dóu Messìo. Aguènt di de vo, aquelo fèsto d'aquito es dounc la fèsto de l'Encarnacien (25 de mars).

• La fèsto de la Vesitacien de Marìo à Eisabèu, sa vièio cousino qu'esperavo un pichoun de Jan-Batisto. Es à-naquéu moumen que cantè soun Magnificat (31 de mai).

• La fèsto de la Presentacien de Jèsus au Temple e de la Purificacien de Marìo quaranto jour après la neissènço de Jèsus, que li dien Candeloue. Si fa à Marsiho uno proucessien à Sant-Vitour lou jour mume em'un roumavàgi uno semano de tèms après la fèsto (2 de febrié).

• La fèsto de l'Assoumcien de la Vièrgi Marìo, que lei crestian dóu Levant li dien la Dourmicien : à la fin de sa vido, Marìo fuguè enaussado au cièle emé soun amo emé soun couars (15 d'avoust).

5 - La preguiero de Marìo

Es lou Magnificat valènt-à-dire l'acien de gràci que Marìo, qu'èro alor prens de Jèsus, prounounciè quand vesitè sa cousino Eisabèu, elo qu'èro prens peréu, de Jan-Batisto. Aquéu cantico, dins soun tout, es teissu de referènci à la Biblo. Dins soun Coumentàri dóu Magnificat, Martin Luther, l'iniciaire de la Reformo que faguè espeli lou proutestantisme, resumiguè ensinto la lausenjo de Marìo : "Siéu un ataié, pas mai, que Diéu li fa soun obro dedins".

 

Moun amo glourifico lou Segnour,

Moun esperit trefoulis en Diéu, moun Sauvaire !

Beissè seis uei sus soun umblo servènto,

Desenant toui lei generacien mi diran benuroue !

Lou Grand Mèstre faguè pèr iéu de bèllei cavo,

Sant es soun noum !

Soun amour crèisse de paire en fiéu

Sus d'aquélei que lou crègnon.

Fènt desplego de soun bras pouderous,

Escavarto leis auturous.

Fa cabussa lei gros catau de soun sèti,

Enausso leis umble

Cafisse de bèn leis afama,

Fouero-bandisse lei richas sei man vuejo.

Aubouro Israël, soun servènt,

Si souvène de soun amour,

De l'escoumesso à nouèstei paire,

pèr lou bèn d'Abram emai de sa raço, pèr sèmpre.

(Evangèli segound Sant Lu 1, 46-55)

La preguiero à Marìo - Soun tèste es la resulto de siècle de devoucien à Marìo. Sa proumiero partido fa referènci à l'Anounciacien de l'àngi Gabriéu à la Vièrgi emai à l'aculido qu'Eisabèu faguè à Marìo lou jour de la Vesitacien. La segoundo partido li mete lou titre "Maire de Diéu" que li acourdè lou councile d'Efèse en 431.

Vous salùdi Marìo, pleno de gràci ;

lou segnour es emé vous.

De touei lei fremo sias benesido

e Jèsus, lou fru de vouèsteis entraio es benesi.

Santo Marìo, Maire de Diéu,

pregas pèr nàutrei pàurei pecadou,

aro e quand vendra l'ouro de nouesto mouart.

Amen.

La recitacien dóu rousàri - Aquelo eigarello de Revoil sarviguè de moudèle pèr lou decor de la coupolo dóu couar. La courouno dei flour, e dei roso, en particulié, qu'es pourtado pèr quatre àngi e que dins soun cèntre l'a lou mounougramo de Marìo. Entre-mitan deis àngi, de gran detoui lei coulour de capelet nous counvidon pèr prega lou "rousàri". Dins aquesto preguiero si fa la recitacien de 150 "Vous salùdi Marìo", coumo uno meno de courouno de 150 "roso" pourgido à la Vièrgi.

SEGUÈNCI 1

EN ROUMAVÀGI

SEGUÈNCI 2

LA GÀRDI, UNO VIGÌO

SEGUÈNCI 3

LA GÀRDI : UN SANTUÀRI DESPUEI VUE SIÈCLE

SEGUÈNCI 4

UNO GÀRDI MILITÀRI, QUATRE SIÈCLE DE TÈMS

SEGUÈNCI 5

À LA GÀRDI DE MARÌO

SEGUÈNCI 6

À LA GLÒRI DE MARÌO, LOU SANTUÀRI DÓU SIÈCLE XIX

SEGUÈNCI 7

DINS LEI PIADO DE MARÌO, UN POPLE EN PREGUIERO

Please reload